Mijëra njerëz në Berlin u detyruan të largohen nga shtëpitë e tyre pasi një bombë e pashpërthyer e Luftës së Dytë Botërore u gjet në lumin Spree.
Policia ngriti një perimetër sigurie prej 500 metrash në një zonë të dendur të populluar, ndërsa ekipet patrulluan shtëpitë dhe apartamentet për të paralajmëruar qytetarët që të evakuoheshin përkohësisht.
Sipas autoriteteve, bomba ndodhet katër metra nën ujë dhe është e mbuluar nga baltë dhe llum, çka e bën operacionin më të ndërlikuar.
Zhytësit pritet të kryejnë sot një ekzaminim të detajuar përpara çaktivizimit të saj.
Derisa të përfundojë ndërhyrja, trafiku i anijeve në lumin Spree është pezulluar.
Policia gjermane tha se banorët do të mund të kthehen në banesat e tyre pas përfundimit të operacionit, gjatë ditës së sotme.
